Ferskt og gott hráefni Allur fiskur sem verkaður er í Gullfiski er keyptur á fiskmörkuðum. Lögð er höfuðáhersla á að kaupa nýjan línufisk og þá sérstaklega frá vestfjörðum og Snæfellsnesi. Til að fá sem best hráefni er einungis keyptur undirmálsfiskur, en stærð fisksins skiptir máli við þurrkun og einnig bragðgæði. Fiskurinn sem keyptur er kemur til vinnslu daginn eftir kaupin og er hann þá strax fullunninn. Fiskurinn er flakaður og síðan roðflettur, ef þurrka á roðlausa ýsu og að síðustu er honum raðað á sérstakar þurrkgrindur. Grindunum er loks komið fyrir í frysti og þaðan fara allar grindurnar í þurrkklefann. Meðalþurrktími er í kringum 4-6 sólarhringar. Eftir að fiskurinn er orðinn þurr er hann tekinn úr klefanum og strax valsaður sem kallað er. Með völsuninni verður fiskurinn mjúkur og laus í sér. Þegar búið er að valsa fiskinn er honum pakkað í söluumbúðir og settur í kæli. Úr kælinum fer hann beint í verslanir og loks á borð íslendinga. Í Gullfiski er gæðastjórnunarkerfi sem tekur mið af GÁMES / HACCAP aðferðafræðinni. Starfsemin er undir eftirliti frá Heilbrigðiseftirliti Hafnarfjarðar og Sýni Skoðunarstofu. Hreinleiki lands og hafs Það dylst engum að íslendingar hafa yfir einum hreinustu fiskimiðum heims að ráða. Margítrekaðar rannsóknir sýna að sjávarafurðir veiddar í íslenskri lögsögu er með því hreinasta sem til þekkist. Sökum þessa og hve íslensk fyrirtæki standa framarlega í veiðum og vinnslu á sjávarafurðum er eftirspurn eftir íslenskum sjávarafurðum mikil á erlendum mörkuðum.